1
/
5

Outward Bound:完美示範咩叫「生命影響生命」!

撰文:Wantedly編集部

如果大家有睇過上年筆者同Outward Bound做嘅訪問,就會發現呢幾位年輕人已經成長咗唔少,而喺肺炎肆虐嘅情況下,基本上大部份外展課程都停哂,咁究竟呢班Outdoor Instructor嘅日子又點過呢?

▲(文末有彩蛋,記得睇到最後呀~)
▲(左至右)2019年入職嘅三位:Rocky、Peter、Kaycee

肺炎下的Outward Bound

雖然疫情令佢哋冇班帶(但係本地旅行團又可以30個人㗎喎),但佢哋大部分時間都依然留喺Outward Bound個campsite,究竟有咩做呢?

Peter就話:「吓,好多嘢做㗎喎,拎隻獨木舟出去3日2夜呀、潛水、行山、攀石、出艇,真係數唔哂。」Peter最癲試過用兩日時間,由Outward Bound划隻獨木舟去西環、再去屯門黃金海岸上水……

Rocky補充:「係呀,因為好多instructor都會留喺Outward Bound提供嘅宿舍,所以差唔多日日都會一齊夾band、打機、玩boardgame,鍾意玩水嘅就一齊去玩水,攀石行山嘅又會聚埋一堆。」

Kaycee仲癲到試過由campsite徒手划獨木舟去鹽田仔,大家話呢班人係咪癡線㗎……?

▲ 當問到佢哋點解咁癡campsite嘅時候,Peter秒速答:「因為呢片海。我可以即刻答你。」(留意返:張相係影唔到鹽田仔㗎,咁大家自己諗吓Kaycee划咗幾遠……)

所以佢哋幾個好多時都係一個星期番一次屋企,陪屋企人一兩日,食個飯就會碌返入西貢。但除咗玩之外,喺呢段非常時期工作上又有咩做呢?Kaycee就話:

「最主要都係做maintenance同renovation,其實咩都有啲:砌吓攀石牆呀、髹油呀、同新入職instructor做training之類。」

雖然聽落好似有啲無聊,但Rocky就補充:「帶班實係開心好多嘅,但趁而家幫手整好啲個campsite,等遲啲開返班嘅時候大家都會有多啲嘢玩,新入嚟嘅instructor都會比較ready去帶班。」

撇除啲「無聊」嘢,佢哋仲由零開始,為咗隻新Longboat去砌一份SOP,一手一腳將成隻Longboat嘅操作、維修、注意事項之類寫低,準備喺Outward Bound名留千古。

而除咗做internal嘅工作之外,Outward Bound仲參與好多義工嘅campaign,其中一個就係Adventure Clean Up Challenge。所以就算冇班帶,都唔係喺度hea㗎。

▲ 介紹返,呢隻就係佢哋研究嘅Longboat,佢哋仲話呢隻船真係好好玩!(照片由Outward Bound提供)

究竟「帶班」有咩咁吸引?

佢哋係咁提帶班帶班,但佢哋都做咗年幾,冇理由仲係咁鍾意呢份工㗎?但佢哋三個都話自己比起初入嚟更加鍾意呢份工,因為帶班嘅感覺真係好正。Kaycee就話:

「其實當初冇班帶好唔慣,因為入嚟Outward Bound做就係想帶班,當你每次帶完班都見到學員因為你而有轉變,個感覺真係好。」

Kaycee仲話一直都有帶開一班女clients,其中一個學員由最初連行樓梯都怕高,去到而家就算大風大浪都可以好有信心咁起帆船上落。就算勁暈船浪勁想嘔,佢地都會撐住幫你轉咗帆先,做完哂野先返轉頭嘔,真係好體現到佢哋當年上training course嘅時候記低嘅一句說話:

“You have more in you than you know. If you can be made to see it, perhaps for the rest of your lives you will be unwilling to settle for less.”

至於Peter最深刻嘅帶班經歷,竟然係關一班「佬」事:

「嗰日係要帶一班成年男人去划艇,成個course其實大家都唔多好deep嘅交流,但點知嗰日佢哋都反哂艇,好似經歷咗生死咁。然後嗰晚嘅sharing大家都講好多好personal嘅嘢,其中一個仲話想離開咗呢個camp之後去修補返某啲關係。」所以Peter佢哋當年training嘅時候,其中一個trainer強調嘅說話就係:Let the nature speak。

而令佢最開心嘅就係見到一班「學員」,帶走喺Outward Bound嘅經歷,去改變返自己嘅人生,當然帶唔同班嘅時候,學員嘅sharing都會令佢哋參透到好多人生道理。

▲ 戴起頂cap帽就有個「教練款」啫,其實除咗頂帽,佢哋只不過係廿幾歲嘅年輕人。

一年前|一年後

話說筆者一年後再一次見到佢哋,除咗覺得佢哋成熟咗之外,氣息都同以前唔同咗。被問到佢哋自覺呢年幾時間有咩改變,佢哋就分別咁答。

Peter:「個人慢活咗囉,一開始畀人嘅感覺係做所有嘢都好急、好冇手尾,但而家起碼可以照顧到每一班學員,自己都識得慢慢享受個大自然。」

佢仲話當佢划住隻獨木舟經過維港嘅時候,就發覺人類其實真係好渺小。

Kaycee聽完之後就笑住咁講:「我就一定係快手咗,因為初初比較內向,做嘢啲手腳好慢,但做得instructor,你就一定要做好自己先,可能係主動啲、出多啲聲之類,因為你畀幾多,你就會收返幾多。」Kaycee仲話自己以前遇到唔識嘅嘢就會避,而家就算唔識都會頂硬上。

至於Rocky又點呢?「因為instructor之間都會互相畀意見,好多時我收到嘅feedback就係太長氣、太多口水,好多時其實學識點樣聆聽更加緊要。」

當然,喺呢年幾時間入面,改變嘅唔止係佢哋自己,Outward Bound都不斷改變緊,Rocky就咁講:「而家Outward Bound好睇重我哋嘅career development,用多好多資源去train up我哋,無論係請外國嘅expert嚟又好、買新equipment都好,所以會比以前更加清楚見到自己條career path。」

如果大家有心機睇到最後,筆者深信你絕對想同佢哋一齊改變自己、改變人哋。如果係咁就快啲apply下面個job post去成為佢哋一份子啦!

▲ 後記:筆者一行人去到Kaycee宿舍嘅時候,就問吓佢可唔可以影吓佢間房啦,點知佢笑住咁話:「欸……影門口得啦,裡面太亂啦。」咁唯有等大家自己望住下面張相,自己幻想吓Kaycee間房係點啦~
Outward Bound Hong Kong's job postings
3 Likes
3 Likes